冠軍
亞軍
季軍
殿軍
意大利
法國
德國
葡萄牙
參賽球隊
編輯
種子隊
第二組別
第三組別
第四組別
特殊組別
阿根廷 巴西 英格蘭 法國 德國 意大利 墨西哥 西班牙
安哥拉 澳洲 科特迪瓦 厄瓜多爾 加納 巴拉圭 多哥 突尼西亞
克羅地亞 捷克 荷蘭 波蘭 葡萄牙 瑞士 瑞典 烏克蘭
哥斯達黎加 伊朗 日本 韓國 沙地阿拉伯 千里達多巴哥 美國
塞爾維亞黑山
根據新規定，主辦國德國直接進入決賽週，上屆冠軍巴西仍然要經過外圍賽先至可以入。所以，德國入咗A組並且出席揭幕戰，而巴西就入咗F組。
呢屆世界盃有唔少球隊第一次入決賽週，例如嚟自非洲嘅球隊加納同安哥拉，南美洲嘅千里達和多巴哥，歐洲嘅烏克蘭，重有28年冇入決賽週嘅澳洲。
歐洲球隊包辦四強
編輯
揭幕戰喺6月9號舉行，德國以4–2擊敗哥斯達黎加。分組賽階段開始，32支球隊分成8組，進行24場。每組頭兩名可以進入淘汰賽階段，打16強賽事。
喺分組賽階段，所有亞洲隊伍，日本、伊朗、沙特阿拉伯同埋上屆第四名南韓全部出局。
進入淘汰賽，有部分新晉球隊打入十六強，分別係加納，烏克蘭同澳洲。
喺十六強，墨西哥、澳洲、加納分別比阿根廷、意大利同巴西淘汰。於是所有北美洲、大洋洲同非洲嘅球隊都出咗局。剩低6支歐洲同兩支南美洲嘅球隊進入八強賽。
去到八強，最後兩支南美洲球隊阿根廷同巴西又分別俾德國同法國淘汰出局，四強席位全部由歐洲球隊包辦，佢哋分別係德國、意大利、葡萄牙同法國。除咗上屆冠軍巴西爆冷出局之外，葡萄牙亦爆冷贏咗冠軍熱門英格蘭，奇蹟噉樣兩次打入世界盃，兩次都打入四強。
四強賽中，德國同葡萄牙被淘汰，進入7月9號晚舉行嘅季軍賽，德國以3:1打敗葡萄牙，成為季軍。
決賽喺7月10號舉行，意大利迎戰法國，呢場亦係法國隊隊長施丹職業生涯中嘅最後一場，上半場，法國隊喺7分鐘先由施丹射入一球領先，意大利嘅馬特拉斯喺19分鐘射入一球追成平手，雙方喺下半場至到加時都冇入波，最後要以互射十二碼分勝負。法國隊嘅大衛•查斯古特射中門楣，意大利射入晒，以5–3嘅成績成為冠軍。
「三黃一紅」事件
編輯
喺F組分組賽第二輪澳洲對克羅地亞嘅比賽中，英格蘭球證普爾喺下半場62及90分鐘分別向克羅地亞中堅施蒙歷出示黃牌，但係當出示第二張黃牌時竟然唔記得用紅牌將施蒙歷趕出場，旁證同埋第四球證亦都冇提水。結果下半場補時第3分鐘再向施蒙歷出示黃牌時先醒起要將佢紅牌趕出場。
「三黃一紅」事件成為球迷對普爾嘅笑柄，亦係世界盃目前絕無僅有嘅案例。賽後普爾宣布唔再吹國際賽事。
意大利 vs 澳洲
編輯
16強其中一場賽事：意大利對澳洲。呢場波雙方攻門場面唔少，但係就係攻極都唔入。當球迷都等待緊呢場波會進入加時嘅時候，比賽尾段意大利嘅格羅素殺入禁區跌倒，球證毫不猶疑地直指十二碼，由托迪操刀主射絕殺澳洲。不過根據慢鏡顯示，格羅素殺入禁區嗰下係明顯自己插水，澳洲球員同佢可以話係近乎零接觸。賽後西班牙球證麥甸拿備受批評。
「紐倫堡戰役」
編輯
16強其中一場賽事：葡萄牙對荷蘭，亦係呢屆世界盃出名嘅「紐倫堡戰役」。呢場波嘅焦點唔係喺場波度，而係雙方經常出現火爆鏡頭。而且俄羅斯球證艾雲諾夫時鬆時緊嘅判決亦都係令場波失控嘅原因之一。結果去到球賽後段兩隊踢得更加狼，最後更加講手，而且衝突雙方唔局限場上球員，後備席嘅球員亦都有參與衝突。結果兩個巴塞隆拿隊友雲邦賀斯同迪高先後被紅牌趕出場。之後鏡頭影到兩人坐埋一齊談論，而且都對自己俾人趕出場非常無奈。最後艾雲諾夫總共出示咗16張黃牌同4張紅牌（兩隊各兩個球員，都係兩黃一紅），係歷屆世界盃最多黃牌同最多紅牌嘅比賽。直至2022年世界盃8強荷蘭對阿根廷嘅比賽中以18張黃牌打破歷屆世界盃最多黃牌嘅記錄。
施丹頭鎚事件
編輯
施丹用頭撞向馬特拉斯心口，被紅牌趕出場。
決賽嘅加時階段，發生咗一段插曲，間接導致法國隊輸波，就係喺加時賽開賽7分鐘，施丹用頭撞向對方球員馬特拉斯嘅心口，力度非常大，馬特拉斯迅速跌低喺地上，球證伊利桑度出示紅牌將施丹驅逐離場。雖然施丹最後都因為世界盃中嘅出色表現而攞到金球獎，但係呢件事已成為咗施丹職業生涯中嘅一大污點。
事後施丹接受法國電視台訪問，佢話因為馬特拉斯曾經三次用說話侮辱佢阿媽同家姐，佢忍無可忍先至會失去理性撞向馬特拉斯；另一方面，馬特拉斯亦有接受《米蘭體育報》，話自己冇鬧施丹嘅媽媽，但暗示可能有用不雅言語挑釁施丹。事件發生後，唔同嘅新聞不停湧現，例如國際足協會長白禮達有意褫奪施丹嘅金球獎，對施丹同馬特拉斯展開紀律調查。甚至有法國律師質疑球證伊利桑度違反「唔准睇錄影帶做判決」嘅原則，要求重賽。
紀律委員會喺2006年7月20號進行，地點係國際足協總部瑞士蘇黎世。施丹被判停賽三場並罰款7,500瑞士法郎，而馬達拉斯則停賽兩場並罰款5,000瑞士法郎，由於施丹已經宣佈退役，三場停賽將以三日社會服務令代替。同時國際足協宣佈決賽期間球證並冇利用錄影帶翻睇事件經過，因此決賽唔使重賽，另外亦保留施丹當選金球獎嘅資格。